Tannie Salomé sterf ná kort siekbed

Familie en vriende het op 22 Mei met groot hartseer afskeid geneem van tannie Salomé Lourens van Levubu wat ná ‘n kort siekbed aan kanker oorlede is.

Tannie Salomé (‘n nooi Brink), haar pa Danie, ma Lena en suster Rita het hulself in 1950 op Levubu kom vestig. Nadat sy haar skoolloopbaan voltooi het, het sy as posmeesteres by Levubu Poskantoor gewerk. Op 23 Desember 1967 tree sy in die huwelik met oom Nick Lourens. Hulle het hulself op Levubu gevestig, waarna oom Nick sy eie besigheid bedryf het. In 1969 verhuis hulle na Ratombo Schoonuitzicht, waar hulle in die saagmeulebedryf betrokke raak.

“Ma Salomé het haar liefde vir die natuur uitgeleef. Sy het ‘n besonderse liefde vir plante en diere gehad, asook haar medemens wat sy met raad en daad altyd bygestaan het. Haar ou liefdevolle tuintjie is leeg sonder haar, maar al die soete herinneringe van 'n mens so minsaam goed sal altyd in ons harte bly voortleef,” sê die familie.

Tannie Salomé word oorleef deur haar eggenoot Nick, twee dogters (Adele en Nicolette), twee skoonseuns (Pieter Swanepoel en Bennie van der Merwe), en suster Rita du Plessis. Die familie het hul dank uitgespreek teenoor al die familie, vriende en kennisse vir hul ondersteuning en bystand. Hulle het ‘n spesiale woord van dank gerig aan dr. Casper Venter wat geen moeite omsien het om vir tannie Salomé te kom besoek en te ondersteun nie.

News - Date: 14 June 2013

Andries van Zyl

Andries joined the Zoutpansberger and Limpopo Mirror in April 1993 as a darkroom assistant. Within a couple of months he moved over to the production side of the newspaper and eventually doubled as a reporter. In 1995 he left the newspaper group and travelled overseas for a couple of months. In 1996, Andries rejoined the Zoutpansberger as a reporter. In August 2002, he was appointed as News Editor of the Zoutpansberger, a position he holds until today.

Email: [email protected]