Getal witkruise bly steeds groei
Date:
Read:
Vyftien nuwe wit kruise is voorverlede naweek by die Witkruismonument op die N1 suid tussen Polokwane en Mokopane geplant.
Die eerste kruise is in 2004 ter nagedagtenis aan slagoffers van plaasmoorde geplant en sedertdien word daar elke jaar nuwe kruise bygevoeg.
Lita Fourie, wat self haar ouers in ‘n plaasaanval verloor het, het Tabita-hulporganisasie vir slagoffers van plaasmoorde gestig en dié organisasie is verantwoordelik vir die onderhoud van die monument.
“Ons kry baie navrae oor die monument en dit is veral oorsese joernaliste wat by ons aanklop vir meer inligting. Ons beoog om binnekort ‘n museum op die perseel op te rig, met foto’s van plaasmoorde. Ons besef dat dit baie sensitief is, omdat meeste plaasmoorde baie wreedaardig is, maar mense moet sien hoe ‘n plaasmoord lyk sodat daadwerklike pogings aangewend kan word om verdere moorde te voorkom. Daar is ook al verskeie dokumentêre programme vir organisasies soos die BBC by die monument gemaak.”
Kruise is hierdie naweek onder andere vir Frik Hermann, wat in Februarie op ‘n plaas in die Vaalwater distrik vermoor is, geplant. Die Potgieter-gesin, wie se moordenaars verlede week in die hof in Bloemfontein verskyn het, se kruise met hulle name op is ook deur Fourie namens die familie geplant.
Herstelwerk is ook die naweek aan die monument gedoen en die sowat 2 000 wit kruise is nou selfs meer sigbaar vir motoriste wat op die N1 verby die Ysterberge ry. (LiN Nuus / Bosveld Bulletin)
