Geesdriftige opkoms na jaarlikse Geloftefees
Date:
Read:
Te midde van nat koue weer is die Geloftedagviering op die Schoemansdal Feesplaas by Louis Trichardt vanjaar weer gekenmerk deur ‘n geesdriftige opkoms van digby 200 feesgangers.
Die Geloftediens is behartig deur ds. Hans Grobler van die Gereformeerde Kerk Louis Trichardt. Met die tema Die Here haal my nie uit die storm nie, maar rus my toe om te roei het hy beklemtoon dat daar nie hemel op aarde aan gelowiges beloof is nie. Te midde van teleurstellings, verlies en vrees, word gelowiges deur Sy teenwoordgheid bemagtig en bemoedig, sodat hulle nie moedeloos hoef te raak en nie deur vrees verlam word nie, maar as toegeruste gelowiges moedig en doelgerig met hul dagtaak kan voortgaan en in geloof selfs die oënskynlik onmoontlike met vertroue kan aandurf.
In die Geloftefeesrede het mnr. Fanus Viviers gewys op die verskil tussen ‘n verbond en ‘n gelofte en die belangrikiheid daarvan beklemtoon om ‘n gelofte gestand te doen. In ‘n oorsig van die Bloedrivier-gebeure het hy verwys na die deeglike fisiese en geestelike voorbereiding wat die botsing tussen ‘n skrale minderheid gelowiges en ‘n oormag van derduisende voorafgegaan het. Hiermee saam het hy verwys na die Goddelike beskikking in die omstandighede, wat gelei het tot verstommende welslae in wat hy beskryf het as die grootste enkele veldslag wat nog in Afrika plaasgevind het. Hy het gesê “Die God van Bloedrivier is vandag nog dieselfde.”
Die feesverrigtinge het die oggend begin met die aankoms van ‘n perdekommando, wat ‘n afskrif van die Gelofte aan feeskomitee voorsitter Abrie Wepener oorhandig het, gevolg deur ‘n vlaghysing. Na afloop van die Geloftediens is kranse op grafte in die begraafplaas langs die feessaal gelê.
Onder die talle feesgangers was die oudste oorlewende voorsitter van die feeskomitee, Oom Pieter de Vaal, voormalige prokureur, historikus en bekende skilder.
