MAKHADO (LOUIS TRICHARDT) – 'n Twee-en-dertigjarige lugmagkorporaal, kpl. Dawid Ras (32), het verlede Vrydag hier in die plaaslike landdroshof verskyn op klagte van korrupsie, omkopery en bedrog.

Ras se arrestasie en verskyning in die hof volg na 'n lang en uitgebreide ondersoek rakende die toekenning van onder meer instandhoudingskontrakte aan 'n privaat persoon. Dit word beweer dat Ras omkoopgeld en –geskenke ontvang het in die vorm van onder meer 'n 4x4-voertuig en 'n boot, in ruil vir die toeken van kontrakte. Ras werk by Lugmagbasis Louis Trichardt se aankope-afdeling en is onder meer verantwoordelik vir die inwin van kwotasies en die toeken van kontrakte.

Die saak teen Ras behels 'n ingewikkelde netwerk van beweerde bedrog ten bedrae van digby 'n miljoen rand. Verskeie mense word by die saak geïmpliseer, insluitend 'n prominente besigheidsman van die dorp, en die prominente kerkgenootskap, die Sioniste Kerk (ZCC). Meer arrestasies word verwag.

Die spilpunt waarom die saak sal draai is Ras se beweerde betrokkenheid by die verkryging en uitleen van die lugmag se Komatsu-stootskraper vir privaat doeleindes, sonder die lugmag se toestemming of wete. Die stootskraper is na bewering, onder voorwendsel dat dit in die proses was om gediens te word, deur 'n plaaslike besigheidsman vir 'n periode van dertig dae aangewend vir die voltooiing van 'n ontbossing- en grondverskuiwingskontrak vir die Sioniste Kerk naby Chukonbane op die Witvlagpad. Die besigheidsman het na bewering R480 000 in kontant ontvang vir die kontrak. Ras het glo 'n sleutelrol gespeel in die verkryging van die masjien vir die besigheidsman en die daaropvolgende toesmeerdery rondom die aangeleentheid.

Ras se saak is uitgestel na 21 November vanjaar. Volgens ondersoekbeamptes is dit net 'n kwessie van tyd voordat hulle die betrokke besigheidsman vastrek