‘n Bekende inwoner, skilder, oud-prokureur en –burgemeester van Makhado (Louis Trichardt), oom Piet de Vaal, het op 19 Maart sy negentigste verjaarsdag gevier. 

Op Saterdag, 16 Maart, het sy kinders besluit om hom te trakteer en die dag ekstra spesiaal te maak deur vir hom te kom kuier by Ons Tuiste. Al vyf sy dogters was daar om saam met hom tee te drink in die sitkamer van die siekeboeg.

Sy een dogter, Caromin Louw, wat in Engeland woonagtig is, het spesiaal vir die geleentheid gevlieg.  Milda Stanton en Inarié de Vaal het ook onderskeidelik vanaf Pretoria en Johannesburg gekom vir die geleentheid. Linette van der Merwe en Pétria Marais is gelukkig hier woonagtig.

Dr. Kobus Stanton, sy een skoonseun, het hom gepas gelukgewens met die groot mylpaal in sy lewe. Van die dogters het ook tydens hul kort toesprake hom gelukgewens en Ons Tuiste se personeel bedank vir die wonderlike wyse waarop hulle 24 uur per dag na Oom Piet omsien.

Inarié  het intussen ‘n besondere projek aangepak deur ‘n album saam te stel van afdrukke van Oom Piet se skilderye wat tans in die familie se besit is. Die album is as geskenk aan hom oorhandig. Sy sou graag ‘n volledige inventaris wou saamstel van al die skilderye wat hy deur die jare geskilder het en versoek persone wat in besit is van sy skilderye om haar te skakel by tel. 083 626 2361.