Hoërskool Louis Trichardt se toneelgroep het teruggekeer met ‘n algehele vierdeplek vanaf die Aardklop Kunstefees in Potchefstroom.

Die skool se Flikker toneelstuk van Nico Scheepers, wat vroeër vanjaar aangewys is as die ATKV se streekswenner, is uitgenooi om by Aardklop te gaan opvoer. Dit is ‘n prestasie wat Nico al vier jaar na mekaar behaal het.

Flikker gaan oor die sinnelose geweld wat in elkeen skuil en het ses goue toekennings gekry, vir regie, ontwerp, beligtingsontwerp, tegniese aspekte, individuele speler André du Preez en vir ensemblespel.

Hierdie jaar het die Hoër Meisieskool Bloemhof, met hulle toneelstuk Sneeuwitjie en die Sewe Zombies, stof in die oë geskop van die ander skole toe hulle as wenners bekroon is. Die naaswenner was die Hoërskool Jan van Riebeeck met hulle produksie, Kragbox.

Flikker is ook as ‘n finalis genomineer in die kategorieë beste hantering van tegniese aspekte, beste ensemblewerk, beste akteur in ’n ondersteunende rol (André du Preez as Silas) en beste regisseur (Nico Scheepers).