MAKAHDO (LOUIS TRICHARDT) - “Die langste plaasnaam wat daar bestaan is Tweebuffelsmeteenskootmorsdoodgeskietfontein!” Hierdie brokkie slimmigheid kom van Henri Boshoff (15) wat die afgelope vakansie twee bokke met een skoot platgetrek het.

Henri het ‘n jaggeleentheid gekry by Klipkrans naby Orania in die Noordkaap waar hy saam met sy ouers, ds. Willem en Nalize Boshoff en hul familie vakansie gehou het. Dit was twee dae voor sy verjaarsdag op 29 Desember.

“Dit was my eerste suksesvolle jagpoging,” sê Henri wat vertel hoedat hulle al douvoordag met die jaggewere gestap het.

“Ons het teen ‘n koppie uitgeklim (ja, daar is koppies!) en toe ons in die son inkom, het ons en die ribbokke mekaar gelyktydig gesien. Die bokke het om die kop gehardloop en ons het beweeg na waar hulle eers was. Ek sien toe ‘n bok met sy blad mooi oop. Ek het net die voorste een gesien. Ek het dooierus oor my pa se skouer geneem. Hy het naderhand gewonder of ek nog gaan skiet. Toe ek skiet, toe val daar twee!” vertel Henri.

Henri het gehelp met die afslag en opdeel in snitte. Dit was nou nadat hy die ooi se lewer moes sluk. Miskien noem Henri eendag sy plaas Tweeribbokooiemeteenskootmorsdoodgeskietkrans …