TSHANDAMA – Nga murahu ha u fhedza tshifhinga tshilapfu vha sa wani mishumo, vhafumakadzi vhavhili vha mazhakandila a vho ngo tenda u dzula nga nala na u vhulawa nga ndala - vho dzhia vhukando ha u tou diitela mishumo vhone vhane.

Vho-Thifhelimbilu Nemukula (43) na Vho-Tshilidzi Makhado (30) vha Tshandama, vho di dzhenisa kha vhutsila ha u ita minwadzi ya vhafumakadzi ya tshizwino-zwino, hu u itela u thusa lushaka na u tshidza mita yavho vhone vhane.

Vho-Thifhelimbilu vho talutshedza Mirror hei miloro yavho na khonani yavho ya thoma hone: “Ro sedza ra vhona hu si na mishumo nahone zwi tshi khou konda vhukuma uri muthu a tholiwe. Ro sedza hafhu zwibveledzwa zwine zwa sa tou vha zwinzhi nga ngeno vhuponi hashu, ra wana uri ndi khwine ri tshi bveledza minwadzi ya vhafumakadzi, nahone ya tshizwini-zwino. Sa izwi ri vhathu vhe u runga ra vha ri tshi hu funa, a zwo ngo vhuya zwa ri dzhiela tshifhinga tshilapfu u imisa tshiimiswa tshashu. Naho ri tshi shumisa mitshini ya u runga, hu na zwinzhi zwine ra tou runga nga zwanda zwashu kha minwadzi iyo, hu u itela u nakisa…”

Vho-Thifhelimbilu vha tshi isa phanda vhari vhone na khonani yavho vha a kona u ita minwadzi ine ya swika mitanu nga duvha kuduni kwe vha hira fhala Sentharani ya zwa Mvelele (Arts Centre) Tshandama.

“Vhathu vhane vha renga minwadzi yashu ndi vhafumakadzi vha henengeno mahayani. Munwadzi muthihi ri u rengisa nga mahumi matanu (R100) naho zwi tshi dzhia tshifhinga tshilapfu vhukuma u u runga. Ri a kona u kuvhanganya tshelede ine ya swika R800 nga nwedzi nahone i a ri konisa u tshila, naho kha yeneyo ri tshi dovha ra bvisa inwe ya u renga tshitoko.”

Kha vhanwe vhafumakadzi vho dzulaho nga nala, Vho-Thifhelimbilu vhori: “Khofhe dzi ambadza madzanganda nahone vhubva vhu bveledza ndala fhedzi. Vhafumakadzi imani nga milenzhe ni diitele mishumo vhunga muvhuso u sa zwi koni u thola vhathu vhothe vha si na mishumo.”