JIM MASINDI – Zwo thoma sa madze musi a tshi lidza tshitiringo hu u itela u dimvumvusa ene mune. Maduvha e si mangana, phungo ya vha yo ya sa mulilo wa vivhini.

Namusi u vho tou rambiwavho na mabephani u mvumvusa vhahulisei-zwimebi nga tshone tshitiringo tshawe. Izwo ndi zwitukutuku nga ha u bvelela ha musuhana Phillip Tshililo, mulidzi wa tshitiringo ane a vha na bvumo kha lothe la Ha-Tshivhasa.

Phillip, ane a vhmuededzi wa Mbalo sekondari ya ntha ya Matavhela uri o thoma u takelela Tshitiringo nge a vhona uri vhunambi ha tshilidzo itsho vhu khou tahela tshothe vunduni la Limpopo. Naho hu na zwinzhi zwe a tou digudisa kha tshilidzo itsho, uri a nga si hangwe u livhuwa khonani yawe ya mbiluni, Chester Musetha wa Tshixwadza we a mu khwathela vhukuma kha vhutsila ha u lidza tshitiringo.

“Nyimbo dzanga dzi angaredza nga maanda zwidade na zwirendo zwa sialala saizwi muhumbulo wanga muhulwane u wa u tutuwedza lushaka u vhulunga zwine zwa vha zwalwo. Arali ra litsha u lidza zwilidzo izwi zwa sialala, iyi mirafho ine ya khou tevhela i do funzwa nga vhafhio? Ndi zwa ndeme u tsireledza sialala yashu ngauri i sumba divhazwakale na vhubvo hashu.”

Phillip u vho tou dzula e milomoni ya vhathu vhu nga hothe hune a devha hone tshitiringo tshawe a tshi sia bvumo li si na vhukuno. U ri muhumbulo wawe ndi wa u rikhoda nyimbo dzawe studio u itela uri muzika wawe u swikelele khuda dzothe dza shango.

“Hu si kale vha do pfa ndo dzhena studio, hu hone muzika wanga u tshi khou kolongonya khuda dzothe dza shango nga vhuphara. Ndo no lugisa nyimbo dzine dza vha na tshivhalo, dzine nda fulufhela uri dzi tou vha mutoli wa ndevhe kha vhatevheli vhothe vha muzika wanga.”

Nyimbo dza Phillip dzi katela zwidade zwi ngaho Nyamutwa wo lala, Tshi na ntovhole, Tshitututu-tshitutu, lu Muofhe hae, Mafula, Muthavhela na Mutshavhona.

Nga hone vhukoni hawe, Phillip u anzela u vhonala a tshi khou devha tshitiringo tshawe hu u nakisedza katara dza Shufflers Ragimana na Jahman Chiganja.

“Ndo diimisela u funza vhane vha toda u lidza tshilidzo itshi vhunga ndi sa tami tshi tshi ngalangala kha divhazwakale yashu. Ri fanela u ima nga milenzhe u itela u kutela na u vhulunga sialala yashu.” Ndi ene a tshi khwaedzela nyambedzano yashu.