MAKHADO (LOUIS TRICHARDT) - Plaaslike digter Jan de Bruyn is uitgenooi om op te tree by Versindaba - die eerste groot Afrikaanse poësiefees in die geskiedenis.

Versindaba word gehou in die HB Thom-teater in Stellenbosch op 9 en 10 September. Nasionale en internasionale poësiefeeste is in sommige lande baie bekend, maar vind nou vir die eerste keer in Suid-Afrika plaas. Heel gepas word die Versindaba bekendgestel in die vorm van ‘n gedig deur Philip de Vos -

Welkom by ons Versindaba:

‘n nuwe Afrikaanse baba.

Hier is digters en poëte:

Heel-vernaam of half vergete.

Hier is kleintjies; hier is grotes

Ook in gees reeds dié wat dood is.

Of dit fraai of goor of gek is

Elken sing soos hy gebek is.

Jan de Bruyn sal van sy eie gedigte voorlees by die Versindaba. Hy tree op saam met talle bekende digters waaronder ook verlede jaar se Hertzogprys-wenner, HJ Pieterse, en Ilse van Staden, wenner van die Ingrid Jonkerprys, Lina Spies, George Weideman en Petra Müller. Die uitnodiging om by die Versindaba op te tree, kom na aanleiding van vier radiouitsen-dings en goeie resensies van De Bruyn se bundel Witvuurlig. Dié digbundel het verlede jaar bekendstellings in Stellenbosch, Johannesburg en Louis Trichardt gehad.

Buiten die poësie voorlesings is daar ook ‘n vasvra van digters teen die media, gesprekke oor die stand van Afrikaanse poësie en paneelbesprekings. Die Versindaba sluit af met ‘n interessante Bekgeveg waar digters uit die vuis gedigte moet maak oor onderwerpe wat die gehoor voorstel.