MAKHADO – Inwoners het die afgelope week met hartseer verneem van die dood van Mev. Helen O’Reilly (58).

Mev. O’Reilly is op Saterdag, 17 September, na ‘n lang siekbed aan longkanker oorlede. Sy was bekend vir haar jarelange eienaarskap van Helen’s Petshop, asook as vorige eienaar van Flamingo Pets.

Helen, soos almal haar geken het, is verlede jaar die eerste keer met kanker gediagnoseer. Sy het die laaste paar maande intensiewe chemoterapie ontvang. Daar kon nie geopereer word nie, aangesien die kanker reeds te ver versprei het. Weens die behandeling was sy die afgelope paar maande nie betrokke by haar besigheid nie, wat sy in die bekwame hande van haar eggenoot, Steve, gelaat het.

Helen word oorleef deur haar man, kinders Lee, Stephen, Gerald, Robert en Michael. Sy sal onthou word as ‘n liefdevolle ma, eggenote en ouma.

“Sy was ‘n baie besige mens en harde werker,” onthou haar seun, Robert.

‘n Roudiens sal op Donderdag, 22 September, om 12:00 vanuit die NG Kerk Louis Trichardt-gemeente vir Helen gehou word. Sy sal veras word.

Die familie spreek hul opregte dank uit teenoor ds. Willem Boshoff, dr. Emile Gaigher, dr. Fred Badenhorst en Leon Fensham van Da Silva Apteek vir hul volgehoue bystand en ondersteuning. Hulle het ook al die vriende, familie, kliënte en kennisse wat Helen deur die jare en met haar siekte ondersteun het, bedank.