MAKHADO – ‘n Bekende voormalige bankbestuurder van Nedbank, mnr. Marius van Zyl, ondergaan hierdie week ‘n beenmurgoorplanting in sy stryd teen kanker.

Nickey van Zyl, Marius se moeder, het op Dinsdag gesê hoe dankbaar hulle is dat Marius se broer as beenmurgskenker kon optree.

“Die dokters was verbaas dat twee broers sulke identiese chromosome kan hê,” sê Nickey. Hulle is ook dankbaar vir al die bidgroepe van die verskillende kerke wat vir Marius bid.

“Die groot ding is nou om te bid dat Marius nie infeksie kry nie. Dan het hy 95% kans op herstel,” sê Nickey.

Pa Ockie en ma Nickey is bekende inwoners. Marius se vrou, Fransie, was voorheen onderwyseres in Engels by Hoërskool Louis Trichardt. Fransie hou nou skool op Polokwane en sy gaan Donderdag met die twee seuns deurry na Pretoria waar Marius in die Little Company of Mary Hospitaal behandel en geopereer sal word.

Ma Nickey vertel dat Maandagaand ‘n krisis vir Marius was.

“Sy mond was so vol sere en het vreeslik gebrand van al die chemoterapie sodat hy amper nie kon praat nie. Almal is egter baie positief oor die operasie.”