Mnr. Frederick Johannes Fritz , beter bekend as Fred, is op Saterdagmiddag, 11 Maart, tragies oorlede in ‘n motorongeluk op die hoek van Jeppe- en Krugerstraat.

Twee van Fred en sy vrou, Ellen, se kinders was saam met hom in die voertuig toe die ongeluk plaasgevind het. Die kinders het die ongeluk, ‘n botsing tussen hulle en ‘n minibus-taxi, oorleef. Fred se afsterwe het as ‘n groot skok vir die familie gekom.

Die 48-jarige Fred was vir jare in die boubedryf en was tot met sy dood werksaam as voorman verwer by Struwig Bouers, waar sy vrou ook ontvangsdame is.

Ellen sê dat Fred vir sy gesin geleef het en altyd vol grappies was, alhoewel hy by die werk bekend was as ‘n streng man. Hy was baie lief vir musiek en visvang.

Fred is op 8 September, 1947, gebore en sou volgende jaar sy vyftigste verjaarsdag gevier het. Hy word op Vrydag om 12:00 begrawe deur pastoor Mike Dippenaar vanuit die Pinkster Protestante Kerk.

Wyle Fred laat sy vrou, drie kinders en een kleinkind agter. Al die kinders woon in die omgewing. Sy twee seuns, Freddie (getroud met Annette) en Charl, woon in die dorp en sy dogter, Rachel, wat getroud is met Marius de Jager, woon op Levubu.

Die familie bedank pastoor Dippenaar, John en Marietjie Struwig en al die familie en vriende vir hul bystand.