Die skielike heengaan van ‘n bekende inwoner, mnr. Willie Kern, op Sondagmiddag, 19 Maart, laat ‘n groot leemte in die gemeenskap.

Mnr. Willen Jacobus Kern, beter bekend as oom Willie, is gebore op 20 November, 1932, en is oorlede in die ouderdom van 73 jaar en 4 maande.

Oom Willie was ‘n bekende boer in die Maastroom-omgewing en het meer as twintig jaar in Louis Trichardt gewoon, waar hy eiendomme verkoop het en afgetree het.

Sy eggenote, mev. Jayne Kern, is baie dankbaar teenoor al die mense wat altyd gewillig was om oom Willie te help as hy in die straat moes in- of uitklim uit die motor. Oom Willie is tien jaar gelede met Parkinson se siekte gediagnoseer.

“Baie van die mense wat gehelp het, het ons nie eers geken nie,” sê mev. Kern.

Willie en Jayne is getroud op 30 Junie, 1951, en het reeds hulle goue bruilof saam herdenk. Vanjaar sou hulle 55 jaar getroud gewees het.

Wyle Willie is op Woensdag (22ste) om 14:00 begrawe vanuit die Hervormde Kerk. Hy laat sy vrou, drie kinders, Paul, Kerneels en Emayne, tien kleinkinders en twee agterkleinkinders agter.

“Ons sal hom onthou as ‘n wonderlike pa en oupa,” sê sy seun Kerneels en skoondogter, Ludi.

Buiten vir al die mense wat in die straat gehelp het, wil mev. Kern graag haar kinders en vriende bedank, asook die medici en almal in die gemeenskap wat op verskeie maniere ondersteuning verleen het met die siekte sowel as die dood.

“Dankie aan almal wat bereid was om die tweede myl saam te stap,” sê mev. Kern.