Die 49-jarige Francois Martinus Labuschagne van Louis Trichardt het verlede Donderdag (23 Februarie) weer vlugtig in die handelsmisdaadhof in Bellville verskyn op klagte dat hy na bewering beleggers uit sowat R1 miljoen bedrieg het.

Labuschagne, ‘n voormalige finansiële adviseur van Sanlam, is op 15 Januarie in Louis Trichardt gearresteer deur lede van die plaaslike speurtak, in samewerking met die Wes-Kaapse Valke. Sy saak is oorgeplaas na die handelsmisdaadhof in Bellville, waar hy op 24 Januarie verskyn het. Tydens hierdie hofverskyning het Labuschagne aansoek gedoen om regshulp. Hy is vrygelaat op waarskuwing dat hy op 23 Februarie weer in die Bellville hof moet verskyn.

Labuschagne se saak is verlede week weer uitgestel, dié keer na Maandag, 27 Maart, sodat sy regshulp met hom kan konsulteer. Sy arrestasie volg na afhandeling van ‘n ses-jaar-lange ondersoek teen hom. Die ondersoek hou verband met sy werksaamhede as 'n Sanlam finansiële adviseur op Ceres tussen 2005 en 2010.