Die Erfenisstigting het as deel van hul landswye erfenisbewusmakingsprojek hul eerste landswye slypskool op 22 Maart in Louis Trichardt aangebied.

“Die slypskool het sommer baie goed afgeloop, te danke aan die geesdriftige mense van Louis Trichardt. Met hierdie werkswinkels hoop ons om gemeenskappe te help om self verantwoordelikheid te neem vir die dokumentering en basiese versorging van die erfenisterreine ensovoorts in hulle gebied,” het me. Riana Mulder van die Erfenisstigting in Pretoria na afloop van die byeenkoms gesê.

Tydens die slypskool is daar ‘n komitee saamgestel wat plaaslik die belange van die streek en sy mense se erfenis sal beskerm. Die komitee bestaan uit Annekie Jandrell, Linette van der Merwe, Inga Gilfillan, Christa Lourens, Jeanne Swanepoel, ds. Petrus Kriel, Schalk en Dodrie Corbett, Chrizelda Koen en Petria de Vaal-Senekal. “Hierdie persone vorm die kerngroep wat besig is om geboue, terreine, monumente, grafte en ander dinge van historiese en kultuurhistoriese belang te identifiseer. Daar sal eersdaags weer vergader word om prioriteite te identifiseer,” het Mulder gesê. 

Volgens Petria sal plekke van belang voorrang geniet om die nodige versorging te kry. “Instandhouding sal gereël word en die publiek sal bewus gemaak word van ons erfenis in ons onmiddellike omgewing,” het sy gesê.

As deel van die eerste nasionale slypskool is die komitee onder meer ingelig oor die jongste wetgewing wat erfenisbewaring betref en hoe dit van toepassing gemaak kan word. “Erfenis sluit nie net in fisiese terreine, dokumente ensovoorts in nie, maar ook geestelike erfenis, byvoorbeeld legendes, verhale en herinneringe. ‘n Databasis sal opgestel word, wat ook sal insluit ou foto’s, kaarte, dokumente, dagboeke en rekords om sodoende ‘n argief vir ons omgewing op te bou,” het Petria gesê. Hierdie inligting sal dan deel vorm van die groter databasis wat by die Erfenisstigting (by die Voortrekkermonument) bewaar sal word.

‘n Beroep word op alle lede van die gemeenskap gedoen om die komitee behulpsaam te wees met enige bystand. Die komitee beplan ook verskeie fondsinsamelingsprojekte om projekte te finansier. Vir meer inligting, skakel Pétria by tel. 082 555 1672 of Riana van die Erfenisstigting by 087 150 6582 of stuur ‘n e-pos aan haar by [email protected].