‘n Verhoordatum moet nog vasgestel word in die saak van drie mans wat daarvan beskuldig word dat hulle ‘n 16-jarige seun aangerand het.

Die drie mans van Louis Trichardt het verlede Vrydag weer in die plaaslike distrikshof verskyn. Hulle word van aanranding aangekla, na ‘n voorval by die Rugbylapa op 6 Januarie vanjaar.

Een van die mans sou glo die 16-jarige seun daarvan beskuldig het dat hy ‘n verhouding met sy vrou gehad het. ‘n Woordewisseling het ontstaan en die seun het probeer wegkom. Hy het klaarblyklik kort na dié onderonsie gestruikel en op ‘n skerp stok geval wat deur sy ribbekas gesteek het. Die seun moes vir ‘n geruime tyd gehospitaliseer word ná die insident.

Die drie mans het Vrydag net vlugtig in die hof verskyn, waarna hulle saak uitgestel is tot 23 Junie, waarna daar na verwagting voortgegaan sal word om ‘n verhoordatum vas te stel en die saak afgehandel kan word.