Besoekers aan die munisipale begraafplaas in Louis Trichardt moet maar versigtig wees.

Buiten vir die misdaadgevaar, met talle inwoners wat die afgelope paar maande deur rowers daar oorval is, is slange en ander ongewenste gediertes ook tans ‘n probleem.

Die rede hiervoor is dat die gras nou al so lank is dat dit baie van die grafte totaal en al verswelg het. Meegaande foto’s is reeds voorverlede week deur ‘n besoeker aan die begraafplaas geneem. Bykans twee weke later is die gras steeds nie gesny nie.

Die Zoutpansberger het verlede week die Makhado Munisipaliteit versoek om te verduidelik waarom hulle nie meer die gras in die begraafplaas sny nie.

Munisipale woordvoerder mnr. Louis Bobodi het Dinsdag gereageer deur te sê dat hulle ernstige probleme het met stukkende masjinerie, waarvan sommige reeds aan die begin van die jaar onklaar geraak het. Dit kan dalk ook verduidelik hoekom lang gras ook elders in die dorp te sien is op munisipale persele.

Volgens Bobodi het die stukkende masjinerie veroorsaak dat hulle nie kan byhou met hul program van instandhouding in parke, ontspanningsareas en die begraafplaas nie. “Ons is besig om die probleme uit te sorteer,” het Bobodi gesê.

Hy het bygevoeg dat hulle nie ‘n afsonderlike span werkers het wat net na die begraafplaas omsien nie. “Die sny van gras hang af van die seisoen en tempo waarteen die gras groei. Dit is egter staande praktyk dat ons ten minste een keer per maand die gras sny. Ons het middel Februarie die gras laas gesny. As alles goed gaan, sal ons teen middel April weer kan sny,” het Bobodi gesê.