Oom Willie Jacobs, beminde oud-inwoner van die dorp en ook een van die oudste manlike inwoners van Ons Tuiste, is verlede week ter ruste gelê.

Oom Willie is oorlede op 13 September in die ouderdom van 88 jaar. Hy sou verlede week 89 jaar oud geword het en is op 19 September vanuit die N. G. Kerk Louis Trichardt begrawe.

Oom Willie, gebore op 22 September 1917, het sy lewe lank in die Louis Trichardt omgewing gebly, buiten vir ‘n periode van agt jaar na sy vrou, Marie, se dood. Die egpaar was woonagtig op ‘n hoewe op die pad na Levubu. Hy het lank by Northern Motors gewerk waar hy gevorder het tot onderdele-bestuurder. Na aanleiding van sy puik werk is hy gekies om na die Skandinawiese eilande, Italië en Duitsland toe te gaan.

Ons Tuiste se inwoners onthou oom Willie as ‘n sterk en hulpvaardige persoon wie se hande vir niks verkeerd gestaan het nie. Baie take in die ouetehuis was sy verantwoordelikheid.

Tot ‘n paar jaar gelede het hy sy gereelde oggendstappie van ‘n hele aantal kilometers onderneem. In Februarie vanjaar het hy ‘n hartoperasie ondergaan en ‘n pasaangeër ontvang. Sy herstel was merkwaardig, maar hy het ‘n knou gekry met die onverwagte dood van sy geliefde skoonseun, mnr. Johan Louw, die voormalige eienaar van Rebels Take Away.

Die afgelope twee maande het sy gesondheid vinnig verswak en is hy in Ons Tuiste se siekeboeg aan hartversaking oorlede.

Wyle mnr. Jacobs word oorleef deur sy dogter, mev. Louise Louw, en sy seun en naamgenoot, mnr. Willie Jacobs. Hy laat drie kleinkinders na, mev. Marietie Louw-Carstens en mnre. Willem en Francois Jacobs, asook ‘n agterkleinkind, Klara.

Die familie bedank graag die personeel van Ons Tuiste vir die goeie versorging van hul vader en grootvader deur al die jare en in die besonder vir mev. Anna van der Merwe vir die laaste twee maande se intensiewe versorging. Verder word die gemeenskap bedank vir hul ondersteuning met die afsterwe en begrafnis.