Die naamborde op die deurpaaie na Louis Trichardt gaan verander word van Makhado na Louis Trichardt.

Mnr. Ishmael Essa, streeksbestuurder van die noordelike streek van die Suid Afrikaanse Nasionale Padagentskap Beperk (SANPAB), het Dinsdag gesê dat hy sowat twee weke gelede in ‘n vergadering was waar die saak van die terugverandering van die dorp se naamborde ter sprake gekom het.

"Ja, ons gaan Louis Trichardt terugsit," het mnr. Essa gesê.

"Dit sal ‘n bietjie tyd neem, maar dit behoort teen Augustus gedoen te wees." Hy het gesê dat ‘n plat staal bord met die naam Louis Trichardt bo-oor die naam Makhado met klinknaels vasgesit sal word.

Mnr. Essa was nie bewus daarvan dat die naam Makhado by baie van die borde met swart spuitverf toegespuit is nie.

"Dit is definitief nie ons nie! Ons gebruik nie spuitverf nie. Dit klink na vandalisme," het Essa gesê.

"Dit is ook definitief nie ons nie," het mnr. André Naudé van die Voorsittersvereniging (VV) weereens hierdie week beklemtoon. "Ons keur dit nie goed nie en sal nooit iemand aanraai om die reg in eie hande te neem nie."

Mnr. Naudé het gesê dat hy groot waardering daarvoor het dat SANPAB die regstelsel respekteer en die naamborde gaan verander na Louis Trichardt. Die appèlhof het op 29 Maart die VV gelyk gegee in hul appèlsaak om die naamsverandering van Louis Trichardt na Makhado tersyde te stel.

Intussen verkeer die vandale wat die naamborde beskadig op vrye voet.