Rypskade van miljoene rand is die afgelope weke veroorsaak oor groot dele van die Limpopo Provinsie.

In die Soutpansberg-area is enorme skade aangerig aan veral aartappel- en tamatie-oeste, terwyl verskeie ander winteroeste ook erg deurgeloop het.

In die omgewing van Waterpoort en Vivo is aartappel- en boontjie-oeste op sommige plase heeltemal vernietig, terwyl die meeste ander ook groot skade gely het. Boere in die omgewing van Alldays het eweneens groot verliese gely.

Van die boere langs die Limpopo het die meeste hul hele tamatie-oeste verloor, terwyl veral opkomende boere wat fabriekstamaties in die Tshipise-vallei verbou, eweneens die grootste gedeelte van hul oeste kwyt is.

Waarnemers sê dat die uitwerking van die jongste rypskade binne die volgende maand of twee duidelik gevoel sal word, wanneer groentepryse weens die groot tekorte noodwendig drasties sal styg.