MAKHADO (LOUIS TRICHARDT) - Ouers van Laerskool Soutpansberg is in kennis gestel dat seker klasse vanaf Januarie 2005 gekombineer sal word.

Afrikaanse Graad 6- en 7-leerlinge sal volgende jaar in een klas geakkommodeer word. Hulle sal dieselfde rooster volg, maar verskillende opdragte voltooi en verskillende toetse en eksamens aflê. Die Afri-kaanse Graad 4- en Graad 5-klasse sal op dieselfde manier gekombineer word.

Hierdie besluite is genoodsaak as gevolg van die krimpende getal leerlinge in die skool wat graag deur medium van Afrikaans sou wou onderrig ontvang en die invloed wat dit op die personeelvoorsiening van die skool het.

In ‘n skrywe haal die skoolhoof, mnr. John Whiteley, die Departementele beleid aan wat sê: “... if there are 40 requests per Grades 1-6 or 35 requests in Grades 7-12 for instructions in a language ...”

Die huidige Graad 1- en Graad 2-leerlinge is so ‘n klein groepie dat hulle steeds, na kombinasie, nie ‘n klas op hul eie regverdig nie. Hierdie leerlinge sal saam met Engelse leerlinge in ‘n klas geplaas word waar die onderrig in beide onderrigtale sal geskied.

Mnr. Rossie Bezuidenhout, voorsitter van die skool se beheerliggaam, het gesê dat dit nog te vroeg is om ‘n uitspraak te gee oor die bestuur van ‘n moontlike Afrikaanse Graad 1-klas vir volgende jaar.