Baie mense glo die warm winderige toestande wat Dinsdag begin het bring die ernstige koue, maar vir die Oosthuizen-egpaar van die plaas Last Hope op die Vivo-pad het dit ook skade gebring.

Die sterk rukwinde Woensdagoggend het ‘n ou Jakaranda-boom op hul erf ‘n finale nekslag toegedien en omgewaai. Soos die noodlot dit wou hê, het die boom bo-op twee van hul voertuie beland en die uitgangspad versper.

Met die Zoutpansberger se aankoms op die plaas het Hein, Hannetjie en hul seun Hein-Julius steeds verslae gestaan en kyk na die skade. Hul Volkswagen-minibus het onder die gewig van die swaar boom gekreun – voorwiel hoog in die lug soos die boom op die agteras afgedruk het. Een van die takke het Hannetjie se Golf getref en ‘n duik in die dak geslaan.

“Dit het geklink soos ‘n geweerskoot. Ek het eers gedink iemand skiet op my,” het Hein vertel. Die slag was egter die boom wat geknak en platgeval het.

“Jy sal nie glo nie. Net verlede week wou ons die versekering op die minibus kanselleer. Ook maar goed ons het nie,” sê Hannetjie.

Ten spyte van die Oosthuizen-egpaar se skade, is daar in hierdie storie ook ‘n ligpuntjie. Met klagtes van swak dienslewering het ook die plaaslike brandweer al in die verlede onder kritiek deurgeloop. Die skrywer van hierdie artikel kan egter in dié geval die teendeel bevestig.