Die Soutpansberg Belastingsbetalersvereniging (SBBV) gaan ‘n dispuut verklaar met die Makhado Munisipaliteit. Hierdie ingrypende besluit is Donderdag (17de) geneem tydens ‘n spesiale algemene vergadering van die SBBV in die Ferdie Beyerssaal op Louis Trichardt.

Die vergadering is deur die SBBV belê in protes teen wat hulle noem die Makhado Munisipaliteit se swak dienslewering.

“Daar kan nou nie meer verder gewag word met ‘n dispuutverklaring met die munisipaliteit nie, omdat dienslewering verder agteruitgegaan het die laaste jaar,” het mnr. Herman Smith, voorsitter van die SBBV, tydens die vergadering gesê. Hy het onder meer verwys na verskeie knelpunte soos die swak toestand van die dorp se rioolstelsel, paaie en watervoorsieningsnetwerk.

Die proses behels dat belastingbetalers die opsie het om hul maandelikse munisipale heffings en belastings in ‘n trustrekening in te betaal, eerder as direk aan die munisipaliteit. Hierdie trustrekening sal dan deur ‘n buitepersoon, in oorleg met die munisipaliteit, geadministreer word om toe te sien dat die geld korrek aangewend word.

Smith het na afloop van die vergadering gesê dat alhoewel hulle besluit het om die bal aan die rol te sit ten opsigte van hierdie proses, hulle eers ‘n bestuursvergadering moet belê om te bepaal wat die proses gaan behels en wat dit gaan kos.

“Daar gaan prokureurskostes wees en ons sal iemand moet aanstel om die administrasie te hanteer. Ons sal moet uitwerk waar ons gaan geld kry, want ons kan nie die trustgeld gebruik nie,” sê Smith.

Hierna, sê Smith, sal die munisipaliteit op terme geplaas word om binne ‘n redelike tydperk hul probleme aan te spreek.

“Ons sal vir hulle ‘n brief skryf waarin ons klagtes uiteengesit word.”

Indien die munisipaliteit dan nie aan die klagtes gehoor gee nie, sê Smith, sal daar dan begin word om belastinggeld in ‘n trustrekening in te betaal.