“Ek moes leer dat as die dokter inkom en die nuus is nie so goed nie, om te weet dat God steeds goed is. Kyk na die lewe deur God se oë: Hy sien nie die probleme raak nie, net die antwoorde,” sê Martin Puth, vader van baba Nathan wat wag vir ‘n ope-hartoperasie.

Klein Nathan is op 17 Junie gebore met hartvate wat omgeruil is. Verlede Vrydag, 25 Julie, het die medici by die Unitas Hospitaal in Pretoria sy medikasie gestaak, die masjiene ontkoppel en hom twee dae gegee om te lewe. Hy het wonderbaarlik aan die lewe gebly en die regter ventrikel van die hartjie moet nou sterker word sodat die hartvate in ‘n operasie geruil kan word.

Pastoor Stefan Pieterse sê dat klein Nathan se jong ouers, Martin en Marlien Puth, vir hom en die gemeente ‘n inspirasie is. Martin en Marlien is musiekleiers by die Volle Evengeliekerk in Louis Trichardt. Sedert Nathan se geboorte waak hulle pal by sy bedjie.

Ma Marlien het Woensdag gesê dat Nathan se medikasie Vrydag weer hervat is en dat die suurstof­saturasie in Nathan se bloed Dinsdagaand in die 80 was. Dit is al baie beter as die 24 wat dit twee naweke terug was. Die hartspesialis kom aan die einde van die week van verlof terug.