Die voertuig en toerusting waarmee die bekende mev. Maud Myburgh die plaaslike gemeenskap op Louis Trichardt so getrou en doeltreffend met noodhulpdienste versorg, het dringende opgradering nodig.

‘n Byeenkoms van sake- en gemeenskapsleiers, wat belê is om aandag te gee aan hierdie aangeleentheid, het eenparig hul waardering uitgespreek vir die gehalte diens wat mev. Myburgh lewer en besluit dat die ambulansvoertuig (‘n 1978 model) verkieslik met ‘n nuwe en deeglik toegeruste voertuig vervang moet word.

‘n Loodskomitee is aangewys om die aangeleentheid te ondersoek, die doeltreffendste opsies aan te dui en voorbrand te maak vir ‘n insamelingsveldtog waarby die hele gemeenskap betrokke kan wees.