Menige inwoner het die afgelope naweek met groot verwondering die markiestent, wat bo-oor Wolmeransstraat, skuins onderkant Rissikstraat, opgerig is, gade geslaan.

Inwoners wat hulself teen die tent vasgery het, moes maar noodgedwonge gebruik maak van ‘n ompad. Niemand was bewus van die voorneme om die pad te sluit nie en dit is nêrens geadverteer nie. Dit het die vraag laat ontstaan of daar enigsins goedkeuring deur die munisipaliteit verleen is vir die oprigting van die tent en die toemaak van die straat.

Na talle navrae het die munisipale woordvoerder, mnr. Louis Bobodi, uiteindelik Woensdagoggend erken dat die tent onwettig oor die pad opgerig is en dat die munisipaliteit inderdaad nie toestemming daarvoor verleen het nie, ten spyte daarvan dat ‘n aansoek ontvang is. Die tent is opgerig vir die doeleindes van ‘n begrafnis.

Bobodi het verduidelik dat daar klaarblyklik ‘n “misverstand” ontstaan het tussen hulle en die betrokke familie wat aansoek gedoen het vir die oprigting van die tent. Toestemming is nie verleen om die tent oor die pad op te slaan nie, maar toe plaaslike verkeerspersoneel Vrydagmiddag daar opdaag, was die tent klaar opgeslaan. Die maatskappy van Thohoyandou wat die tent opgeslaan het, was ook reeds weg en niemand anders wou die tent weer afslaan nie. Die tent het toe maar gebly, sonder toestemming, en is eers laat Saterdagoggend afgeslaan.