Die Stadsraad van Louis Trichardt is wel deeglik bewus van die haglike toestand waarin die dorp se infrastruktuur is. Dit blyk duidelik uit ‘n verslag wat vir die Raad opgestel is deur die waarnemende munisipale bestuurder (MB) insake die dispuut wat teen die Raad verklaar is deur die Soutpansberg Belastingbetalersvereniging (SBBV).

In die verslag word die wetlike gronde waarop die SBBV hulleself beroep, aangehaal, wat bewys dat die Raad bekend is met die inhoud van beide die dispuut en die wetlike vereistes ten opsigte van dienslewering.

In die verslag noem die MB dat die munisipaliteit verantwoordelik is vir kleinskaalse watervoorsiening namens die Vhembe Distriksmunisipaliteit (VDM), wat die hoof watervoorsiener vir die streek is. Hy roem daarop dat die dienslewering aan die dorp en omstreke in hierdie verband hoog is. Hy dui aan dat die totale bergingskapasiteit van die reservoir 23 Ml is en dat daar genoeg water is vir die dorp vir agt ure wanneer daar nie gepomp kan word nie. Hy beskou dit as voldoende, alhoewel die dorp drie maal soveel water benodig. Dié “hoë” standaard van dienslewering kan plaasvind selfs wanneer iets onvoorsiens gebeur, soos wanneer pype bars of onverwagte meganiese of elektriese probleme opduik, asook aktiewe vandalisme, soos die steel van koperkabels wat die pompe van krag voorsien. Inwoners sal hulle egter herinner aan die laaste onderbreking, toe die dorp amper twee dae sonder water was na koperkabeldiefstal by die Albasinidam pompstasie.

Die verslag berig voorts dat fisiese toetse op die water wat aan die dorp voorsien word vir menslike gebruik uurliks uitgevoer word en dat die water geskik is vir dié doel. Die uitdagings waarvoor die munisipaliteit staan, word aangedui as ‘n ontoereikende watervoorsieningsbron, onvoldoende en verouderde watervoorsieningsinfrastruktuur, en aanhoudende en aktiewe vandalisme. Wat eersgenoemde betref, word daar deur die VDM ‘n pypleiding aangelê vanaf die Nandonidam, asook ‘n 10Ml reservoir gebou. Ander maatreëls is die rantsoenering van water deur toevoerbeheer en ‘n gedeeltelike moratorium op nuwe ontwikkelings.

Nog ‘n interessant brokkie uit die verslag is dat die munisipaliteit ook voel dat hulle ‘n hoë kwaliteit diens lewer in terme van riolering. Die huidige suiweringsisteem hanteer sowat 124 liter per sekonde, terwyl die stelsel ontwerp is om 66 liter per sekonde te hanteer. Volgens die verslag lê die probleem by ontoereikende infrastruktuur, en wel by die massarioleringsnetwerk.

“Hoewel dit so is dat oorstromings plaasvind, moet dit insgelyks ook vermeld word dat die huidige uitslae van die toetse op die water wat ons drink aandui dat dit geskik is vir menslike gebruik.”

Wat die paaie en strate in die dorp betref, word die toestand daarvan as ongewens aangedui. “Dit is as gevolg van langdurige verwaarlosing van die paaie asook die dun basis waarop hierdie paaie gebou is.” Intussen het die munisipaliteit begin om nuwe materiaal te gebruik en, “hoewel nog nie voldoende nie, is daar tog ‘n verbetering in vergelyking met die toestand vier maande gelede.”