In ‘n tyd waarin voedselsekerheid een van die hoof probleme van die dag is, het die TLU SA kongres gehou met die tema “Ons boer in Afrika”.

Die plaaslike landbou-unie, TLU SA Levubu het die kongres, wat vanaf 3 tot 4 September by die WNNR in Pretoria aangebied is, meegemaak.

“Ek dink juis in ‘n tyd van voedseltekorte en onsekerheid, dobbel die regering met stabiliteit binne Suid-Afrika deur die landbou ideologies te wil rig. ‘n Honger mens is ‘n onstabiele mens wat net die negatiewe van ‘n regering se onvermoë ervaar en dit kan in die toekoms vir Suid-Afrika baie probleme veroorsaak,” sê die woordvoerder van die Levubuvallei Boerevereniging na afloop van die kongres.

Die belangrike rol en betekenis van die kommersiële boer om te voorkom dat Suid-Afrika die voorbeeld van ander Afrikalande volg wat betref toenemende hongersnood en armoede, is tydens die kongres uitgewys. Toekomsgerigte beplanning, voorkomende onderhoud en die verbetering van produksie en produktiwiteit is kritiese faktore.

 Een van die besluite van die kongres lui dat “TLU SA moet toesien dat die regering in hierdie tyd van ‘n wêreldwye vraagteken oor voedselsekerheid sal besef dat die blanke kommersiële boere sy grootste bydrae is en dat die regering sal ophou om ‘n negatiewe beeld van die boere op emosionele wyse die wêreld in te stuur.”

TLU SA is die oudste landbou-unie in die land en bestaan reeds sedert 1897.

Nog ‘n aspek wat by die kongres aangespreek is, is die uitwerking van onteiening (ter aanvulling van restitusie wetgewing) op die ekonomie.

TLU SA het ‘n besluit geneem wat sy lede se wettige en legitieme eienaarskap van grond bevestig. Die nuutverkose leierskap van die unie is versoek om die geskiedenis van grondverkryging ondubbelsinnig en bo verdenking te verdedig.

“Wat die veiligheid betref, is dit nog steeds kommerwekkend en is ons mense nog blootgestel aan aanvalle met die grootste aggressie en disrespek vir lewe, waarvan die brutale maniere van moord vanself spreek,” sê Annari Muller van die Levubuvallei boerevereniging. TLU SA het tydens die kongres bevestig dat dit die regering se verantwoordelikheid bly om na die veiligheid van Suid-Afrika se inwoners om te sien. Aanvullend daartoe tref lede streng maatreëls ten opsigte van hul veiligheid.