Mnr. Herman Smith, voorsitter van die Soutpansberg Belastingbetalersvereniging (SBBV), het Woensdag sy “uiterste teleurstelling” uitspreek oor die swak bywoning van die vereniging se algemene jaarvergadering op Dinsdag, 21 Oktober.

“Dit lyk vir my asof die publiek tevrede is met die bestuur van die dorp en ook tevrede is met die toestand van dienslewering in die Makhado Munisipaliteit se jurisdiksie. Die kans om die burgemeester, asook die munisipale bestuurder en ander senior munisipale amptenare te ontmoet en vrae met betrekking tot besware te stel, is verspeel,” het Smith gesê nadat slegs 22 mense dié belangrike vergadering bygewoon het.

Smith was erg teleurgesteld hieroor en het gemeen as die dorp se belastingbetalers nie betrokke raak nie, daar heelwat skokke vir hulle wag. Een so ‘n skok wat op belastingbetalers wag, sê Smith, is die feit dat inwoners binne die volgende twee weke verras gaan word met ‘n verhoging in eiendomsbelasting op hul maandelikse munisipale rekening van tussen 200% en 700%. Tans probeer die belastingbetalersvereniging steeds om die implementering van die nuwe erfbelasting te vertraag en juis daarom, sê Smith, is dit belangrik dat almal by die proses betrokke raak.

“Die Makhado Munisipaliteit gaan poog om die totale jaarlikse erfbelasting te verhaal in nege paaiemente. Die rede hiervoor is dat daar nie twee verskillende tariewe in een finansiële jaar toegepas kan word nie, want dit sal strydig wees met die bepalings van die Munisipale Finansiële Bestuurswet. Verder bepaal Afdeling 12 van die Eiendomsbelastingswet dat ‘n tarief vir ‘n jaar gehef moet word en dat dit moet deel vorm van die jaarlikse begroting, wat tans nie die geval is nie. Die konsultasieproses is totaal deur die munisipaliteit geminag. Geen kennis is aan eiendomseienaars gegee dat die eiendomsbelasting gehef gaan word nie en ook nie dat dit op ‘n terugwerkende basis gaan plaasvind nie,” aldus Smith oor die rede waarom hulle die implementering van die nuwe erfbelasting op Louis Trichardt teenstaan.

Smith sê dat die munisipaliteit, in ‘n vorige poging om die nuwe erfbelasting geïmplementeer te kry, geadviseer is om sekere bepalings van hul eiendomsbelastingsbeleid te verander.

“Indien dit verander is sonder om met die belastingbetalers te konsulteer, is die proses ongeldig. Geen impakstudie oor die nuwe beleid is nog deur die munisipaliteit uitgevoer nie, alhoewel hierdie vereniging en ander verenigings die munisipaliteit daaroor gewaarsku het,” sê Smith.