Mnr. Willem Olivier van Cableman op Louis Trichardt weet nou regtig nie meer wat om te doen met die voortslepende rioolkrisis by sy besigheidsperseel in Kortstraat nie.

Op 1 Augustus is daar die eerste keer in die Zoutpansberger geskryf van die riool wat toe reeds al ‘n maand lank by sy sakeperseel uitborrel. In daardie stadium het munisipale amptenaar gesê hulle is bewus van die probleem en sal dadelik daaraan aandag skenk.

Bietjie meer as ‘n maand later het die munisipaliteit nog geen poging aangewend om die gemors te probeer aanspreek nie en daar het weer ‘n berig in die koerant verskyn, waarin mnr. Olivier sy misnoeë uitspreek oor die toedrag van sake. Hy het toe al reeds ‘n kwotasie gaan kry oor wat dit hom gaan kos om die probleem reg te stel. Groot was sy skok toe hy sowat R24 000 gekwoteer is.

‘n Dag nadat die tweede berig op 12 September in die koerant verskyn het, gaan grawe die munisipaliteit bloot ‘n groot sloot langs een van die verstopte mangate met ‘n pypie wat riool uit die mangat in die sloot dreineer. Van toe af het daar steeds nog niks gebeur nie en is daar klaarblyklik geen einde in sig vir mnr. Olivier se nagmerrie nie.

Tydens ‘n derde besoek aan hom Dinsdagoggend het mnr. Olivier nie meer geweet wat om te sê of wie om te skakel nie. Sy sakeperseel ruik soos ‘n rioolplaas en mnr. Olivier is erg bekommerd oor die impak wat dit op sy sakebedrywighede het.