Hoërskool Louis Trichardt spog met nog ‘n Graad 12 leerder, Anton Hartman, met ses onderskeidings. Anton is een van die leerders wie se uitslae onvolledig was.

Die onderwysdepartmente het met verlede jaar se Graad 12 eksamen baie gesukkel om volledige uitslae by derduisende matrieks uit te kry.

Op 5 Februarie het Anton die goeie nuus gekry dat hy ses onderskeidings verwerf het. Sy onderskeidings is in wiskunde, wiskunde vraestel 3, fisiese wetenskappe, lewensweteskappe, geografie en lewensoriëntering.

Anton is ingeskryf vir BSc Geologie by die Universiteit van Pretoria met die oog daarop om ‘n geofisikus te word. Hy sou aanvanklik ‘n beurs by die mynreus Anglo Platinum aanvaar het, maar dit sou beteken dat hy eers ‘n blootstellingsjaar by die myn sou moes doen. Hy het egter besluit om eerder dadelik verder te studeer.

Met al die gedoentes het hy laat geregistreer by die universiteit. Noudat hy egter sy volledige uitslae het, kan hy ook aansoek doen vir ‘n prestasiebeurs.

Daar is verskillende redes waarom die departement laat was met sekere uitslae. In Anton se geval het sy registrasie vir wiskunde vraestel 3 telkens nie gewys nie, al is dit meermale teruggestuur. Gelukkig het Ma Benita, ‘n vakadviseur by die onderwysdepartement, hom aangemoedig om tog te gaan skryf en ‘n voorlopige merkblad is saam met sy vraestel ingestuur. Anton se pa is Lionel Hartman, ‘n landbou-ekonoom en tans bestuurder by ‘n mangodroogaanleg.