Inwoners van Louis Trichardt is toe op die ou end glad nie geraak deur Eskom se beplande kragonderbrekings vir die streek Saterdag nie, alhoewel meeste ander buitegebiede hul beplande onderbrekings gehad het. Sondag was verbruikers op die Louis Trichardt-netwerk egter minder gelukkig.

Kragtoevoer op die hele netwerk het omstreeks 15:00 afgegaan as gevolg van ‘n 22KV-stroomtransformator en –breker wat in Eskom se substasie net buite Louis Trichardt onklaar geraak het.

Dit het ‘n totale kragonderbreking tot gevolg gehad, wat die munisipaliteit genoodsaak het om die kragvrag na verbruikers op die netwerk te beperk. Gewoonlik is daar drie 20MVA transformators tot die dorp se beskikking, maar as gevolg van die probleem is daar sedert Sondagmiddag se skade by die Eskom-substasie slegs twee van hierdie transformators in werking.

Sondag se skade het tot gevolg gehad dat alle verbruikers moes saamwerk om kragverbruik te beperk. Vanaf die Makhado Munisipaliteit se kant af is daar dadelik met groot kragverbruikers, asook besproeiingsboere, in en om Louis Trichardt geskakel met ‘n versoek om hul kragverbruik af te skaal. Gelukkig is daar gehoor gegee aan hierdie versoek, wat verdere onderbrekings voorkom het. Die kragonderbreking het sowat vier ure geduur, voordat dit totaal herstel is.

Teen druktyd was beamptes steeds besig met herstelwerk by die substasie.