Tharien Guillaume, Limpopo-wenner van die Rojac Redenaarskompetisie, het die vooruitsig om in Desember haar tasse te pak en as ’n uitruilstudent na Duitsland te gaan.

Tharien, ’n Graad 11-leerder van Hoërskool Louis Trichardt, het op 17 April aan die finale rondte in Polokwane deelgeneem.

Dit is toe dat sy onverwags ‘n kans gekry het om alles wat sy op haar hart het om vir president Zuma te sê, voor die gehoor uit te spreek. Die onderwerp wat Tharien vir haar onvoorbereide toespraak gekies het, wasWhat I would like to tell the president.

Tharien sê dat sy genoem het dat die president moet toesien dat die grondwet toegepas word en dat hy daaraan moet dink wat die mense van Suid-Afrika van hom dink.

Die tema van Tharien se voorbereide toespraak was Global Warming. Sy het gesê dat aardverwarming nie ’n natuurlike siklus is wat die aarde ondergaan nie, maar ’n skrikwekkende krisis.

“As ons nie ons planeet se hulpkreet beantwoord nie, kan die menslike spesie ook uitwissing in die gesig staar,” het Tharien gesê.

Nou gaan Tharien die kans kry om haar land en provinsie vir ses weke in Duitsland te verteenwoordig.

“Ek was baie, baie verbaas toe ek wen! Maar ek is baie opgewonde om ’n ambassadeur vir my land te wees. Ek kan nie wag om oorsee te gaan en aan al die nuwighede blootgestel te word nie,” het Tharien gesê.