Op stemdag het ouma Feya Bell, wat een van die dae haar 101ste verjaarsdag vier, haar stem uitgebring by Masedi Sekondêre Skool in Tshikota.

Ouma Feytjie het met behulp van haar kierie en die ondersteuning van familielede fluks vanaf die voertuig tot by die stemlokaal gestap en trots haar stem uitgebring. Hulle het gewag tot skemer op 18 Mei sodat dit ‘n bietjie rustiger by die stemlokaal was. Daar het steeds ‘n vrolike atmosfeer in die strate van Tshikota geheers, terwyl die inwoners gesellig in die strate saamgekuier het.

“Hierdie jaar gaan dit ‘n bietjie beter met die stemmery. Maar laaskeer: vergeet liewer daarvan,” is Ouma Feya se waarneming. Met meer as ‘n eeu se wysheid agter haar, is ouma Feya se wens dat daar ‘n regering moet wees wat skoon is van korrupsie. “Ek soek nie corruption nie. Ek bid dat daar nie moord moet wees nie. Die wêreld moet een ding weet: die Here kyk vir ons; ons het nie nodig om te baklei nie,” sê Ouma Feya.

“Sedert 1994 kom stem sy nog elke keer. Ouma Feya bly in Tshikota naby die NG Kerk,” sê haar dogter, me. Babatjie Bell, self al 71 jaar oud.

Ouma Feykie is op 19 Junie 1910 in die Evangelina-distrik naby Pontdrift gebore. In 1936 het sy na Louis Trichardt gekom en woon die afgelope 31 jaar in Tshikota. Ouma Feykie is geseënd met ‘n helder verstand en praat vlot Afrikaans, Tshivenda, Sesotho, Xitsonga en Engels.