‘n Rioolgat in die parkeerterrein van busse reg langs Hoërskool Louis Trichardt se tennisbane het vir amper ‘n maand lank oorgeborrel en in Andersonstraat afgevloei.

“Die rioolwater het al uitgeborrel toe die skool gesluit het op 24 Junie. Wat gewoonlik gebeur is dat die riool by die staatshospitaal verstop en op die skoolterrein uitloop. Die skool en die hospitaal is op dieselfde rioollyn. In plaas daarvan dat die Makhado Munisipaliteit die hele rioollyn kom skoonmaak, gee hulle elke keer net aandag aan die spesifieke plek waar dit uitborrel,” het skoolhoof mnr. Henry Denner Maandag gesê.

Denner het bevestig dat die rioolgat verlede week oopgemaak is. Hy het sy besorgdheid uitgespreek dat die riool nou net weer by die volgende rioolgat in Andersonstraat gaan uitstoot. Die skool is gedurig in verbinding met die munisipaliteit om die rioolprobleme aan te meld.

Vrae oor die rioolwater wat in Andersonstraat afstroom, is bykans twee weke gelede deur die Zoutpansberger aan die Makhado Munisipaliteit gerig. Hoewel geen antwoord ontvang is nie, is die rioolgat gelukkig ‘n dag daarna oopgemaak. Die riool het ophou borrel, maar die opdrifsels lê nog steeds in die straat .

Teen druktyd het die Zoutpansberger steeds gewag op antwoorde van die Makhado Munisipaliteit oor die kroniese probleme met dié spesifieke rioollyn.