Verbruikers kan gereed maak vir ‘n dramatiese verhoging in veral groentepryse.

Dit is die waarskuwing van die Soutpansberg Distrikslandbou-unie ná ‘n verwoestende haelstorm verlede week grootskaalse skade in die Soutpansberg-gebied aangerig het.

Die haelstorm het veral boere in die Vivo en Waterpoort ernstige finansiële skade berokken.

Volgens mnr. Japie van der Goot, voorsitter van Bo-Brakrivierboerevereniging, het die haelstorm sekere boere in sy gebied heeltemal uitgehaal.

“By van die groente-, babagroente- en tamatieboere is alles weggeslaan …niks het oorgebly nie. In een van die gevalle beloop die skade tot soveel as R10 miljoen. Aartappelboere het ook groot skade gehad en bestaande, sowel as aangeplante weiding is weggeslaan. Beeste sal nou gevoer moet word totdat die veld herstel het,” het Van der Goot gesê. Klein tamatieplantjies is heeltemal verwoes en van die boere het reeds weer begin plant.

Geweldige skade is ook in die Waterpoort/Sandrivier-omgewing aangerig, met boere wat tot 50% van hul oeste verloor het. Volgens mnr. Rudolf Otto, voorsitter van die Waterpoort Boerevereniging, het gewasse soos pampoene, spanspekke, soetrissies en babagroente erg deurgeloop.

“Vir van hierdie boere is dit ook nie iets nuuts nie, en een spesifieke boer is nou vir die sesde keer in 16 jaar swaar getref. Tog bly die boere positief,” het Otto gesê.

Skade is ook aan gewasse in die Mopane-gebied aangerig. Tans probeer boere skade aan strukture herstel en ook, waar moontlik, bruikbare produkte van die lande af kry. In baie gevalle is al die blare weggeslaan en as dit nou sou warm word, kan sonbrand netsoveel skade aanrig.