Elf swemmers van Hoërskool Louis Trichardt het die Ebenezer Myl in die Ebenezerdam in Haenertsburg op 18 Maart geswem.

Hierdie dapper swemmers het yskoue water en ‘n digte mis trotseer. So sonnig as wat dit die Saterdag was, so koud en trietsig was dit die Sondag. As gevolg van die mis is die myl (1609 meters) vir ‘n paar uur uitgestel.

Van die deelnemers en hul families het as gevolg van die swak weer opgepak en huistoe gegaan. Toe die aankondiging kom dat die 500m swem wel gaan plaasvind, het die hoërskool swemmers ingespring en geswem. Dit blyk toe vir hulle ‘n opwarming te wees, want nadat hulle ‘n kort ruskansie gegun is, is daar besluit dat mans en vroue gelyk ‘n verkorte myl (1400m) sou swem. Hulle het weer die mistige dam aangedurf. Hulle swem organiseerder, me. Ilze Coetzee, het ter ondersteuning saam met hulle geswem.

Die eerste seun uit die water was Arno Venter (24:46), met Daniël Coetzee (25:48) kort op sy hakke. Die eerste meisie was Amari Kotzé (26:40), met Elouise Spies na haar (28:44). Juffrou Ilze was die vyfde swemmer van die skool om die afstand te voltooi in ‘n tyd van 29:44. Die tye is met die hand geneem  en die amptelike tye was teen druktyd nie beskikbaar nie.

Van die skool se swemmers gaan op 25 Maart die Bosveldmyl swem in Bela Bela.