Bergfietsryers van Louis Trichardt het die afgelope naweek bietjie die bene gaan oefen tydens die Magoebaskloof bergfietsuitdaging oor afstande van onder meer 20km, 35km en 45km.

Sarah Venter, wat die afgelope paar maande haarself gevestig het as een van die streek se top vrouebergfietsryers, het weereens beïndruk deur as eerste vrou oor die wenstreep te trap in die moordende 45km wedren. Sy was ook die eerste vroue sub-veteraan. Shaun Constable het die beste van die plaaslike ryers presteer in die 45km wedren deur algeheel derde te eindig. Hy was ook die eerste senior man tuis.

In die 20km was dit Catherine Labuschagne wat algeheel derde eindig in die vroue-afdeling. Catherine is ook geen vreemdeling op die podium die afgelope paar wedrenne nie. Buiten haar derdeplek was sy ook die eerste vroue sub-veteraan by die wenstreep. Louise Olivier, ‘n leerling van Hoërskool Louis Trichardt, het ook aan die 20km wedren deelgeneem en verras deur algeheel vierde te eindig in die vroue-afdeling.

Marius Smit het ook bietjie gaan sweet. Hy het aan die 35km-wedren deelgeneem en palm ‘n algehele 37ste plek in.