Hoërskool Louis Trichardt se bergfietsspan het ‘n lang en bedrywige seisoen agter die rug deurdat hulle vanjaar, ná die Limpopo liga, ook vir oulaas aan twee van die vier Gauteng ligas gaan deelneem het.

Die span het deurlopend gewys dat hulle ‘n gedugte span is wat goed hulle man kan staan teen die groot skole van die stad.

Op 20 September het die span gaan deelneem aan die Tour de Dal by Hoërskool FH Odendaal in Pretoria.  Triegies eindig algeheel agste uit 47 skole wat op die dag deelgeneem het.  Hoërskool Menlopark was eerste, maar die Triegie Trappers het ander groot skole soos Waterkloof, Garsfontein en Hoërskool Monument goed in die stof laat byt.

Van die Triegie fietsryers wat baie goed presteer het, was Zian van den Heever en Richard Lambert, wat vierde- en sesdeplekke in die sub-junior afdeling uit sowat 100 ander ryers behaal het.  Chris Knoesen en Kombo Bere kom onderskeidelik tiende en elfde in hulle verskillende ouderdomme.

Op 4 en 5 Oktober gaan vyf van Louis Trichardt se jong ryers aan die nasionale bergfietskampioenskappe in Magaliesburg deelneem.   Hulle is Richard Lambert, Heine de Jager, Turner de Swardt, Douglas Archer en Charné Labuschagne. Al vyf vorm deel van die Limpopo Hoërskole Bergfietsspan.