LEVUBU – Die Levubu Rugbyklub, in samewerking met P&L Hardeware, hou op Saterdag, 13 Augustus, ‘n boeredag en sewe-aan-‘n-kant-kriekettoernooi.

Veral besighede word uitgenooi om gebruik te maak van die lekker spanbougeleentheid. Middagete kan gekoop word en verversings sal deurlopend beskikbaar wees. Daar is ook uit-stallings, kosstalletjies en boeresport vir kinders. Die dag se verrigtinge sal afgesluit word met ‘n heerlike skaapbraai en dans. Die kaartjies vir die skaapbraai beloop R50 per persoon.

Dames is ook welkom om spanne in te skryf. Die toernooi het reeds groot belangstelling by besighede ontlok. As gevolg van die tydsfaktor kan slegs twaalf spanne speel. Besighede wat nog belangstel moet voor Vrydag, 5 Augustus, voor 13:00 hul inskrywingsvorms en -gelde instuur.

Besighede wat reeds spanne ingeskryf het sluit in Valley Farms, Vhavenda Bricks, Coca-Cola Fortune, Hippo Staal & Bande, Chanic, die Avokado-studiegroep, P&L Hardeware en Limpopo Melkery. Damesspanne wat reeds ingeskryf het is die Desperate House Wifes, Levubu Masters, die Go-Go Girls, die Baby Sisters Club, die Vise Grip Volcanos en P&L se Hardware Honeys.

Die organiseerders van die dag het hul dank uitgespreek teenoor hul borge, naamlik P&L Hardeware, Coca-Cola Fortune, TATA 4x4, Tusk Venda Casino & Hotel en Vhavenda Bricks.

Vir meer inligting en inskrywings, skakel die Levubu Rugbyklub by tel. (015) 583 0458 of Melanie by 083 651 7601 (na-ure).