MAKHADO (LOUIS TRICHARDT) – Verskeie plaaslike fietsryers van die P&L Hardeware Fietsryklub het tydens die Road Hog fietswedren in Polokwane op 6 Augustus hul stemme dik gemaak.

Veral Renata Joubert het haarself laat geld nadat sy die damesafdeling van 60km-wedren wen met ‘n tyd van 01:53:09 – vier minute voor haar naaste teenstander in die tweede plek. Ander kategoriewenners was Anthony Rathbone met ‘n tyd van 01:48:14 in die mans veterane-afdeling en Rita Schoeman met ‘n tyd van 02:09:53 in die dames veterane-afdeling.

Van die ander klublede wat in die 60km-wedren uitgeblink het, was Hannes Spies (01:53:00) en Mark Archer (01:55:01). Alhoewel harde bene gekou is, het Mattys Beukes snr. (02:09:51), Matthys Beukes jr. (02:10:40), Heine de Jager (02:12:26), Koos Engelbrecht (02:12:28), Lampie Schoeman (02:12:31), Antjie van Heerden (02:21:09), Cató de Bruin (02:21:11), Pravir Patel (02:28:06), David Pretorius (02:29:40), Pramod Patel (02:30:57), Sunil Patel (02:33:20), Meyur Patel (02:38:09), Pretesh Patel (02:38:16), Leoni de Jager (02:44:16) en Antoinette Pieters (02:47:06) ook die 60km-wedren voltooi.

Die hardebaarde, PJ Coetzee en Richard Lambert, wat die 100km-wedren aangepak het, het uitstekend gevaar met onderskeidelik ‘n sesde (02:48:27) en sewende (2:48:30) plek.

Op Saterdag, 13 Augustus, bied P&L Boerebenodighede en die P&L Hardeware fietsryklub die Levubu Leg Burner aan. Wedrenne begin om 14:30 by die Levubu Rugbyklub. Dit beloof om groot pret te wees met ‘n 60km-wedren en ‘n 14km-pretrit wat aangebied word. ‘n Medalje, kospakkie, ete en verversings is ingesluit by inskrywingsfooi van slegs R20. Om in te skryf, SMS “Levubu” plus naam en van na 076 193 9789. Betaling kan tydens registrasie voor verrigtinge gedoen word. Navrae kan gerig word deur 076 193 9789 te skakel.