Die Soutpansberg Gholfklub het hul reeds-prestasievolle jaar op ‘n hoogtepunt afgesluit.

Nie net het die klub onlangs geskiedenis gemaak toe hulle die eerste keer die gesogte Country Cup-trofee ingepalm het nie, maar ook het die klub se A-ligaspan op 27 November as algehele wenners van die provinsiale liga uit die stryd getree. Dit is slegs die tweede keer dat die klub dié prestasie kon behaal, vier jaar nadat hulle die liga vir die eerste keer gewen het.

Die klub se A-ligaspan, bestaande uit Franna Knoetze (spankaptein), Zagrys Nortjé, Wally Jehle, Eben Möller, Jay van der Walt, Hannie Jacobs, Anthony Krügell, Vic Jacobs en Daan en Willie Nel as reserwes, het op 27 November te staan gekom teen Orange Dene op Tzaneen se gholfbaan. Hulle beklink die kragmeting 3-1. Vier spanne van twee spelers elk kompeteer in ‘n beterbal-formaat met een punt vir ‘n wen. Altesaam 16 spanne vanoor die hele provinsie het aan die liga deelgeneem.

Franna, wat ook klubkaptein is, het sy dank uitgespreek teenoor die spelers vir hul ondersteuning, deursettingsvermoë en dissipline wat aan die dag gelê is. Hy het ook groot waardering gehad vir die span se borge, Daan en Willie Nel van Northern Furnitures.