Die Akkedis Bergfietswedren op 29 Julie het Schoemansdal en die Soutpansberg weer omskep in ‘n miernes van bedrywighede. Deelnemers het van afgeleë plekke, selfs Zimbabwe, gekom om die strawwe 70km en die makliker 35km bergroetes te beproef.

Dit was slegs die tweede Akkedis en deelnemergetalle toon reeds ‘n groei van 158% aan.

“Die Akkedis word al amper ‘n Likkewaan!” sê die organiseerders. Daar is ook al onderhandelinge in die pyplyn om die Akkedis deel van ‘n bekende reeks te maak.

Tye het gewissel tussen 2 uur 42 minute en net oor die 7 ure vir die 70km wedren. Sommige ryers het moeg, swetend, bloeiend en vol stof by die eindpunt aangekom, maar almal het net lof en komplimente gehad oor die roete, die organisasie, die mense en die harde, maar pragtige Soutpansberg.

Die gunsteling, Johan van Zyl, het die mansafdeling oor 70km gewen in ‘n tyd van 2:42:23. Die tweede- en derdeplekke is onderskeidelik deur Wouter Staats (2:46:19) en Dana Coetzee (2:47:38) ingeneem.

Samantha Oosthuizen was die brawe eerste dame om die 70km te voltooi. Haar tyd was 3:21:53 en sy was algeheel sewende. Adele Drake (4:17:56) en Fiona Coward (4:44:45) het tweede en derde geëindig.

In die 35km was Bernardt Fourie die eerste man en hy het die afstand in 1:23:16 voltooi, met Chris de Klerk en Paul van der Westhuis in die tweede- en derdeplekke. Ina Snyman was die eerste dame in die 35km (1:51:16) met Susan Grové en Denene de Waal die tweede en derde dames.

Die 10km-pretrit is gewen deur Nic Human, met Willem Belgraver (tweede) en Frans Nel (derde) op sy hakke. Die jongste dogter wat deelgeneem het, was Bianca Spies en die jongste seun Willie Nel.

Die sukses van die tweede Akkedis Bergfietswedren was weereens grootliks te danke aan die uitstekende ondersteuning van die hele gemeenskap, die vrywillige helpers, grondeienaars en besighede. Die personeel by Schoemansdal OOS en die P&L Hardware Fietsryklub word gelukgewens en hartlik bedank.