Hoërskool Louis Trichardt tree vir die tweede agtereenvolgende jaar as wenners van die Super 16-reeks uit die stryd.

Die skool was die algehele rugby- en netbalwenners.

“Die sukses lê by die positiewe gesindheid waarmee die afrigters inklim en daardeur die kinders positief beïnvloed. Dit is tydrowend om so ver te gaan speel, maar die standaard van die wedstryde wat gespeel is, maak dit alles die moeite werd,” sê skoolhoof mnr. Henry Denner.

Twee van die skool se netbalspanne het in die finaal op 18 April gewen. Die O/16-span wen 13-7 teen Hoërskool John Vorster en beklink daarmee hulle eerste plek in die reeks. Die O/14’s word ook met ‘n wentrofee beloon, nadat hulle 27 -13 teen Afrikaans Hoër Sasolburg seëvier. Die O/15’s is naaswenners, nadat Afrikaans Hoër Germiston hulle met 23-18 klop. Die eerste netbalspan behaal ‘n agste plek in die reeks.

Die rugby se Super 16-wenspan is die kranige O/16-span wat in die finaal 17-10 met Afrikaans Hoër Sasolburg afreken. Die O/15-rugbyspan wen 42 -7 teen John Vorster, terwyl die O/14’s en die eerstespan beide teen Nylstroom verloor met tellings van 7-26 en 15 -35 onderskeidelik.

Twee van die meisieshokkiespanne, die eerstespan en die O/14’s, eindig algeheel tweede. Die O/16-hokkiespan eindig derde en die O/15’s sewende.