Die jaarlikse Kremetart Fietswedren het vanjaar gespog met ‘n nuwe toevoeging.

Buiten die 175km en 70km wedrenne die Saterdag, is die eerste Kremetart Bergfietsuitdaging Sondag aangebied. Die wedren het goeie belangstelling ontlok, met heelwat plaaslike renjaers wat die Soutpansberg aangedurf het in ‘n 40km, 30km, 20km en 10km wedren. Dan was daar ook diegene wat die vorige dag die 175km gery het, wat Sondag nog die stofpaaie ook warm gery het.

Een van hulle was Nico Bell, wat die vorige dag algeheel derde geëindig het in die 175km wedren vir mans. Bell het die 40km bergfietswedren gewen, met Jaco Ferreira tweede en Gawie Combrink derde. In die vroue-afdeling was Kerry Baytopp eerste, Lorinda Dando tweede en Adriana Vermeulen derde.

Die 30km wedren word gewen deur Hein Engelbrecht, met Gerhard Pieterse tweede en Tinus Els derde. Eldine Peli is die eerste vrou tuis in die 30km, met Marelen Wietz tweede en Marisa Breedt derde.

In die 20km (onder 16) is dit Louis Trichardt se jong Jaco Linde wat met die louere wegstap. Marco Roets was tweede en Willie Joubert derde. Page Schwiger was eerste in die meisiesafdeling van die 20km, met Landi Roodt tweede en Charmaine Bothma derde.

Alex Hugo wen die 10km (onder 12) wedren, met Triston Schoeman tweede en Heine de Jager (jr.) derde. Die eerste meisie tuis was Heine se sussie, Leandrie, met Cherise Henning tweede en Bernice Cronjé derde.