Hoërskool Louis Trichart tree vir die derde agtereenvolgende jaar as algehele wenners van die Super 16 rugby uit die stryd.

Hierdie eer val die Triegie rugbyspelers te beurt, nadat twee van hul spanne, die O/16’s en O/15’s, na afloop van die finaal as algehele wenners aangewys is. Triegies se eerste rugbyspan en die O/14’s eindig beide tweede in die reeks.

Die O/16-span, met afrigters Coenie de Lange en Theo Muller, wen 24-13 teen Alberton High School en die O/15’s, afgerig deur Tjorra Nagel en Jimmy Moody, wen 5-0 teen Hoërskool Nylstroom. Die finaal is op 15 April op die rugbyveld van die Tswane Universiteit van Tegnologie (TUT) in Pretoria beslis.

Een van die miesieshokkiespanne, die O/14-span van afrigters Adri Denner en Lezahn Vollgraaff, is as Super 16 wenners gekroon.

“In die finaal speel die O/14 meisies ‘n skitterende wedstryd teen Hoërskool Kanonkop en eindig 1-1 gelykop aan die einde van die normale tyd. Die wedstryd word toe met strafhoue beslis in ekstra tyd en ons meisies wen 3-2,” sê hokkie-organiseerder me. Marie van Niekerk.

Die eerste hokkiespan verloor 2-1 in ‘n baie harde finale wedstryd teen Hoërskool Nylstroom en eindig as naaswenners van die kompetisie. Die O/15 en O/16 spanne wen onderskeidelik 6-0 en 2-0 en eindig algeheel vyfde in die kompetisie.

By die netbalspanne vaar die O/15-span die beste en eindig derde in hulle afdeling, nadat hulle  21-19 oor Hoërskool Nylstroom geseëvier het. Die O/14’s verloor 28-18 teen Hoërskool Nylstroom en eindig vierde in die kompetisie. Die O/16-span  wen 22-7 teen Hoërskool Cullinan en eindig algeheel vyfde. Die eerste netbalspan verloor 24-16 teen Cullinan en eindig daarmee sesde in die Super 16 reeks.