MAKHADO (LOUIS TRICHARDT) – Alhoewel die dorp se eerste rugbyspan hul wedstryd in die finaal van die Blou Bulle Plattelandse liga (Limpopo) verloor het, is ondersteuners dit eens dat die span besonders goed gevaar het.

Dit was die algemene gevoel na afloop van die finaal by die Peter Mokaba stadion in Polokwane die afgelope naweek. Louis Trichardt se eerstes het te staan gekom teen Pietersburg Dorp se eerstes. Alhoewel ‘n wen nie vir Louis Trichardt beskore was nie, het die span ‘n seisoen van terugslae, onttrekkings en beserings meedoënloos getrotseer om uiteindelik vir hulself ‘n plek in die finaal te verseker.

Louis Trichardt se punte is aangeteken deur Jorrie Jordaan, Danie Jooste en Nico van der Westhuizen, wat elk daarin kon slaag om deur die verdediging te breek en agter Pietersburg Dorp se doellyn te gaan kuier. Theuns Botha het op sy beurt ‘n verdere twee punte op die telbord geplaas met ‘n suksesvolle doelskop. Die eindtelling was 35-17 in die guns van Pietersburg Dorp.

Met vanjaar se rugbyseisoen byna iets van die verlede neem talle rugbyspelers dié week deel aan die subunie rugbyweek op Levubu. Van die streek se top spelers sal tydens die week in aksie gesien kan word. Elf spelers van Louis Trichardt sal ook uitdraf. Die finaal van die rugbyweek sal Saterdagmiddag (25ste) beslis word.